ඉන්දිගේ මව්පියන් මෙම සම්බන්ධයට දැඩි ලෙස විරුද්ධ වුව ද ඇයගේ බලවත් ආයාචනය මත අකමැත්තෙන් වුව ද එයට අවසර දීමට ඔවුන්ට සිදුවිය.දෙපාර්ශවයේම ආශිර්වාදය මැද ඉන්දි ජයන්ත සමග එක වහලක් යටට වූයේ දහසකුත් බලාපොරොත්තු හදවතෙහි පුරවාගෙන ය. වසරක් පමණ සතුටින් ජීවත් වූ මේ කැදැල්ලට කන කොකා හැඬුවේ ජයන්ත පාප මිත්‍ර ඇසුරට වැටීමත් සමග ය.

                                                        *      *       *

                         " කවා....ලා.......විළඳ ජා...තී......
                            ඇති කළා..........රන් කූ....ඩුවේ   ගිරවා...."

                 ඉන්දි තම සත් මස් වූ දරු ගැබ ඔසවාගෙන  පැමීණ  දොර විවර කළේ  තම සැමියාගේ හඬ ඇසූ  නිසාවෙනි. නොසිතූ  පරිදි කඩා වැටුණු අකුණු පහරක ආලෝකයෙන් සඟයන් කීප දෙනෙකු සමග වැනි වැනී පැමිණෙන තම සැමියා දුටු ඇය ත්‍රස්ත විය.

                        "දෙයි හාමුදුරුවනේ.............ජයේ..ඔයා බීලා නේද?"

         ඉන්දි කෑ ගසමින් ගොස් තම සැමියා අල්ලා ගත්තා ය.

                            " අහකට වෙයං ගෑනියේ"

                           ජයන්ත තම බිරිඳ පසෙකට තල්ලුකර දැමුවේ තව දෙමසකින් දරැවකු මෙලොවට බිහි කිරීමට  සිටින මවක් ලෙසවත් නොසලකමිනි.ඉන්දි එම පහර දරාගත නොහැකි ව විසිවී ගොස් බිම ඇද වැටුණි.හිස ද අසළ වූ මේස කකුලක  වැදී ලේ බිඳු කීපයක් නළල දිගේ රූරා වැටෙන්නට විය.

                             අන්ධකාරයෙන් වෙලාගත් මුළු පරිසරයම නොනවත්වා නගන අකුණු පහරින් ගිගුරුම් දෙන්නට විය.අතරින් පතර වැටුණු වැසි පොද මොර සූරන වර්ෂාවක් බවට පරිවර්තනය වූයෙන් ඒ වනවිටත් උළු වහලයෙන් නැගුණු පිනි බිඳු දිය පහරක් වී සිමෙන්ති පොළව මතින් ගලා ගියේ කඩිමුඩියේ ගුල වෙත ඇදෙන කුහුඹු රැළක් මෙනි.

                              සෑම දිනකම මත්පැන් තොල ගාමින් නිවසට පැමිණීම ඔහුගේ දෛනික රාජකාරිය විය.හිත්පිත් නැති වූවකු මෙන් තම අහිංසක බිරිඳටත් හයක් හතරක් නොදත් දරුවාටත් තලා පෙළන්නට තරම් ඔහු අමනුෂ්‍යයකු විය.ජයන්තගේ ම කපාපු පලුවක් වූ කොලු පැටියා සිය පියාගේ හඬ ඇසුණු විගසම දිවගොස් මේසය යට ගුලි වී සිටියි.තම බිරිඳගේ කෙස් වැටියෙන් අල්ලා පහර දෙන විට ඇය නගන විලාපය ඇසී අසළ නිවැසියෝ ඇයව බේරා ගැනීමට මැදිහත් වන විට ජයන්ත එවුන් පන්නා දැමුවේ අමු තිත්ත කුණුහරප ද පවසමිනි.

                    "නොදකිං නොසණ්ඩාලයා.....ගිනි වතුර ගිලලා ඇවිත් අර අහිංසක ගෑනිව මරා ගන්න හදනවා"

                    ඉන්දිගේ සහායට පැමිණි කුසුමලතාත්, ලලිතාත්,සරණපාලත් ආපසු තම නිවෙස්වලට ඇදුණේ ජයන්තට දෙස් දෙවොල් කියමිනි.

                       "අනේ  අම්මේ.......... මගේ ඔළුව පුපුරන්න රිදෙනවා"

                      දිනක් ඉන්දි තම හිස තදින් බදා ගනිමින් ඇඳෙහිම වාඩි විය.ඇඳෙහි උඩුකුරුව වැතිර සිටි ජයන්ත අවදි වූයේ ඇයගේ විලාපය ඇසීය.ඔහු මෙලෙස තම බිරිඳ හැසිරෙනවා දුටු ප්‍රථම අවස්තාව නොවේ.මීට පෙර ද දෙවරක් මෙලෙසම ඇය හැසිරැණු අතර ඇතැම් අවස්ථාවක සිහිසුන්ව ද ඇද වැටුණි.බියට පත් ජයන්ත ඇයව වෛදයවරයකු වෙත කැඳවාගෙන ගිය අතර ඇය නැවතත් ගැබඅ ගෙන ඇති බව එහිදී සනාථ විය.එය ඇසූ ජයන්ත ඇය කැඳවාගෙන නිවසට පැමිණියේ දත්මිටි කමින් ගොරවමින් ය.

                 " දෙහ කපන්න කිය කියා කට්ටඩියා ළඟට ගිහිං තෝ ඕක ද කර ගත්තේ? "

                    ජයන්ත සිය ශක්තිමත් දකුණත ඉන්දිගේ මුහුණ හරහා යැවූයේ ඇය පොළව මතටම පතිත වන තරම් වේගයෙනි.

                      "දෙයියනේ........මොනවද මේ කියන පොළව නුහුලන කතා.ඒ මනුස්සයා රත්තරං වටින                                      මනුස්සයෙක්."

                        ඉනිදි තම දෑසින් නැගුණු කඳුළු කැට පිස දැමුවේ තමා හා කට්ටඩියා සම්බන්ධ කොට නගන බොරු චෝදනාවන්ට සාප කරමිනි. ඇය සිය පවුලේ වස් දොස් යන්නට දෙහි කප්පවා ගැනීම සඳහා වරක් කට්ටඩියා හමුවට යාම   පිළිබඳ ජයන්ත පසු වූයේ ද්වේෂයෙනි.ඇවිලෙන ගින්නට පිදුරු දමන්නට ඕනෑ තරම් සඟයන් ජයන්තට සිටියි.මහ හඬ තලමින් සිනාසෙමින් ,දත් විලිස්සමින් තම බේබදු සඟයන් පවසන මුසා බස් ඔහු පිළිගත්තේ සාදු සිතිනි. නිවසට ගොස් පිරිඳට පහර දෙමින් යකා නටන ජයන්ත දෙස බලමින් සිනාසෙන්නට තරම් ඔහුගේ කාලකණ්ණි බේබදු යහළුවෝ පහත් ආශාවන්ගෙන් යුතු වූහ.

                              " අනේ..........අර මිනිහා මගේ නංගිව මරාගෙන කන්න හදන්නේ...."

                          ඉනිදිගේ සොයුරිය අසීමිත වූ සහෝදර ප්‍රේමයෙන් ඇයව බේරා ගැනිමට තැත් කළ ද ජයන්ත ඔවුන් හට තම නිවසට නොපැමිණෙන ලෙස තර්ජනය කර තිබුණි.

                                 "අනේ අම්මේ.........මගේ ඔළුව"

                             දෙවනි දරුවා ද බිහි කර වසරකට ආසන්න වුව ද ඇයගේ හිසේ රුදාව සහ සිහිසුන් වීම අඩු වූයේ නැත.ඇය නිතර නිතර සිහිසුන් වී ඇද වැටෙන්නට පටන් ගත්තා ය.නමුත් ජයන්ත බේබද්දෙකු වී සිටියා මිස තම නිවැසියන් පිළිබඳ සොයා බැලුවේ ම නැත.ගම පුරාම ඇයගේ අසනිප වීම පිළිබඳ නොයෙක් අන්දමින් කට කතා පැතිර ගියේ අසුරු සැණිනි.

                        " අනේ අහංසක කෙල්ල.වැඩි වයසකුත් නෑ නෙව."

                        "අනේ මෙහෙමත් කරුමයක්.අර මිනිහා බීලා ඇවිත් ගෑනිට තඩිබාන විදිහට මෙහෙම හරි                                   ඉන්නවා පුදුමයක්."